ما هو برنامج وقاية نبات كلية الزراعة حيث لا يعلمه الكثيرون

برنامج وقاية نبات كلية الزراعة

برنامج وقاية النبات (أمراض النبات ) 

  أولا كدة  مجال وقاية النبات ، وقاية واللي منها يعنى مبيدات ، حشرات ،  امراض ، حيوان زراعي ، بالصلاة على النبي المواد حلوه والقسم حلو بس عايز مذاكرة أول بأول هتنام يوم هتتكعبل 😄✋طب محدش سأل نفسه ليه كتبت برنامج لان هو جواه يحتوي على أفرع يعني أقسام بس منفصلة ولو دخلت أي فرع بتاخد من الباقيين برضو بس ف الآخر كل الأفرع تندرج تحت برنامج وقاية وصلت ⁦❤️⁩

شروط دخولك القسم ده انك تكون ناجح في المواد دي :  

1-علم النبات

2-المملكة النباتية 

3-الأحياء الدقيقة 

4-أساسيات علم الحيوان

5-أساسيات علم الحشرات

6-أساسيات الكيمياء الطبيعية

7-أساسيات الكيمياء العضوية

8-أساسيات الكيمياء التحليلية

• ندخل بقا على طبيعة دراسته ثم مواده  : 

 بيتم في القسم ده بشكل عام  دراسة علوم وأمراض النبات والوقاية منها وهو يعتبر   من أهم  الأقسام في كلية  الزراعة و المجال ده يضم 3  فروع اساسية وهما قسم المبيدات و قسم الحشرات الاقتصادية و قسم أمراض النبات بالإضافة كمان للحيوان الزراعي و بتدرس الفروع دي  كأقسام منفصلة ولو دخلت اي فرع فيهم بيكون   عندك خلفية عن باقي الفروع و بتاخد حجات منهم  لانو كلهم بيندرجوا تحت برنامج وقاية نبات  : 

1- المبيدات :

 

أحد فروع مجال وقاية النبات التي يهتم بمكافحة الآفات الزراعية (الحشرات، الأكاروسات، النيماتودا، القوارض، الفطريات، البكتيريا، الحشائش والقواقع) . كما يتناول علم المبيدات دراسة موضوعات التقييم الحيوي للمبيدات ومقاومة الآفات لفعل المبيدات وسمية المبيدات على الآفات أيضا دراسة تلوث البيئات بالمبيدات وآثارها الجانبية وتقليل مخاطر التعرض لها ويوجد بالقسم وحدة خاصة لمكافحة الآفات. 

اغلب الجامعات في الفرع ده بتاخد مادتين من قسم حشرات ومادتين من أمراض ومواد مبيدات حشائش ده من القسم وماده تخصص عضويه وكل ده منطبق عليك انت وامراض وحشرات ماعدا التخصص طبعا دراسه ممتعه هتشتغل بايدك وهتزرع وترش كل حاجه 

هتاخد إحصاء تبع محاصيل 

هتاخد مبيدات حشرية ومبيدات متكامله الاتنين واحد 

وهتاخد عضوية 

وهتاخد كيمياء فيزيائية  تدريب ميدانى و انجليزى 

والفرع ده تبع وقاية النبات و تتخرج منو تشتغل اول حاجه طبعا 

معيد فى القسم او اى كليه بره نفس التخصص😎

ثانيا تعمل دبلومه تحليل وتفتح معمل 

مراكز البحوث 

معمل مركزى

 

شركات مبيدات - أدوية

حجر زراعي 

تفتح مكتب لوحدك زى الالمانيه كنترول كده 

تفتح محل مبيدات 

مزارع كبيرة 

وفى مجالات كتير مش فاكراها 

بس اقلها  مدرس كيمياء ثانويه عامه وتبقى مليونير💰

قسم مبيدات قسم العظماء 💪😍

2-علوم الحشرات الاقتصادية : 

والفرع ده بيضم دراسة الآفات الحشرية التي تصيب البساتين بفروعها المختلفــة ( فاكهه – خضر – زينه ) وأيضاً الحشرات التي تصيب المحاصيل الحقلية وبالإضافة إلى بيولوجيا وفسيولوجيا ومورفولوجيا وبيئة الحشرات المختلفة. كما يتناول دراسة الحشرات ذات الأهمية الطبية والبيطرية علاوة عن الحشرات التي تصيب الحبوب المخزونة والأشجار الخشبية ويعطى القسم أهمية خاصة مجال المكافحة البيولوجية ومجال النحل. 

والقسم ده دراسته باينه من اسمو القسم ده يتبع مجال وقاية النبات اللي فيه اقسام

(كيمياء_امراض نبات_حشرات) 

وف المجال ده ال3  اقسام دول بيدرسو نفس المواد غير مادة او اثنين متعلقين بالقسم اللي انته فيه 

وطبعا احنا كحشرات في مواد التخصص عندنا بتكون خاصه بدراسة كل حاجه عن الحشرة.

وهتاخدو الاكاروسات ودي خليها مفاجأه للي هيدخل القسم ان شاء الله 😄

ده كده نبذة دمتم سالمين ⁦❤️⁩

3-قسم أمراض النبات (plant pathology )😄

قسم امراض من الاقسام الحلوة جدا ولو انت ليك فى الميكرو بيولوجى هتستمتع جدااا 

أنت بتدرس فى ثالثه ورابعه 80% من الامراض اللى ممكن لما تنزل مزرعه تشوفها وتقدر تتعرف عليها من خلال الأعراض اللى بتظهر 👌👌 فى أى دولة بره بيدرس ككلية لوحده لمدة 7 سنين 😱اها فعليا زيه زى طب عندنا   دكاترة  بس نبات .

امراض نبات من الاقسام الحلوة فعلا 😍😍 هتبقى دكتور نبات 😃😃

هتاخدوا لقب plant doctor 😃😃احنا دكاتره يا بشمهندسين 😂😂 

طبعاً كلنا سمعنا عن القسم ده وعارفين سمعته عاملة ازاي 😂 

القسم تحت مجال وقاية نبات بتدرس مع قسم كيمياء المبيدات وقسم الحشرات مواد مشتركة +مواد التخصص 

المواد دي زي 

1-أمراض نبات عام 

2-كيمياء مبيدات الحشائش

3-بيئة وفسيولوجي الحشرات 

4-مورفولوجي وتقسيم الحشرات 

5-فسيولوجيا النبات

6-تقسيم فطريات "تخصص"

7-مكافحة متكاملة للآفات 

8-مكافحة حشريةوحيوانية 

9-تشريح نبات "تخصص"

10-طرق دراسة أمراض نبات"تخصص"

11-لغة انجليزية 

12-تدريب ميداني 

13-احصاء

•الدراسة في القسم مش صعبة زي ما متخيلين لكن محتاج مذاكرة أول بأول و هتتنفخ امتحانااات😂💔  مش هقول سهل تجيب تقدير لكن لو ذاكرت كويس هيكون اسهل مايمكن ✊

طب لما تتخرج من أمراض هتشتغل فين 😄

1-الحجر الزراعي 

2-شركات الأدوية 

3-شركات الأغذية

4-شركات الأسمدة 

5-المزارع 

6-معامل الميكروبيولوجي

يااااارب تكونوا استفدتوا 😃😃ولو حد عندو أي سؤال أنا فى الخدمة 😉😉

4-فرع الحيوان الزراعي :

فرع الحيوان الزراعي ينقسم إلى ثلاث فروع رئيسية هي الحيوان الزراعي العام والاكاروس والنيماتودا.

• مجالات عمل قسم وقاية النبات بشكل عام وينطبق على كل الفروع اللي اتكلمت عنها فوق يعني البرنامج ككل  : 

 خريج القسم ده بيشتغل في :

 ‏1- في مجال تحليل وتركيب المبيدات الزراعية.

 ‏2- العمل كمهندس مكافحة في شركات ومصانع الإنتاج النباتي.

3- ‏العمل في مجال الإدارة والتسويق داخل شركات المبيدات والأسمدة ومناحل العسل أيضًا.

أهداف برنامج الوقاية ككل بقا ايه  : 

•  إعداد وتنمية مهارات الطالب المتخصص في مجال علوم وقاية النبات ليكون قادرا وملما بالموضوعات الآتية:

1- أهم أنواع الآفات الحشرية والحيوانية المختلفة الضارة بالإنتاج الزراعي بنوعية النباتي والحيواني.

2- الطرق العامة لمكافحة الآفات.

3- مبيدات الآفات.

4- نحل العسل وديدان الحرير.

5- استخدام طرق المكافحة المناسبة لمقاومة الأفات، متجنبا ما يضر بالبيئة.

 6- وضع الخطط لمنع انتشار الأفات.

 7- ابقاء الأفة تحت الحد الاقتصادى للضرر.

 8-تقييم مخاطر المبيدات على الكائنات غير المستهدفة.

 9- إظهار قدراته المهنية بشكل جيد.

 ‏

 ‏**ملحوظة** عشان لو حد قال هو مش في قسم اسمو وقاية هقولك اه في ف بعض الجامعات بيخدوا من كل فرع تحتيه حبة يبقا كوكتيل كدة و يبقا قسم وقاية وصلتلكم

أما وقاية ده برنامج يحتوي تحتيه علي أفرع منفصلة اتمنا تكونوا فهمتوا يعني بالتوفيق يا بشمهندسين 💞