• ما هو قسم بايو تكنولوجي 🤔؟
*للأسف ناس كتير داخلة القسم ومعندهاش معلومات غير انها عايزة تكون دكاترة تحاليل أو أنها تشتغل ف المجال الطبي وانتهينا.
*البايوتكنولوجي
عباره عن استخدام الكائنات الحيه فى انتاج منتجات صناعيه أو حتى زراعية أو غذائية او اكتشاف مواد علاجيه جديده فى المجال الطبى لخدمه البشريه ..
*ال Biotechnology مش موجود في كل الجامعات له ولكن هو عبارة عن 3 تخصصات مهمين جدا وبرنامج خاص ف زراعة القاهرة وعين شمس اي هما ال3 :
(1-Chemistry,2-Micro ,3-Genetics )
ف جامعة الأزهر بيتم تدريس التلاتة ولكن بشكل مش متخصص يعني مفيش ولا واحد من دول 😄
موجودين ف القاهرة وعين شمس طبعا..❤️
====================================
ركز معايا عشان نعرف الفرق بين بايو زراعة وبايو علوم ف جامعات مصر ☺️
مفيش اي فرق هتلاحظه غير ف التطبيق وطريقة العمل ف زراعة وف علوم لكن الاتنين يقدروا يعملوا شغل بعض بحكم المعلومات والمحتوى المتشابة ف كل منهما..
احنا بقا كزراعة نشتغل ايه !!
في زراعة بنشتغل على 3 حاجات ف بالبايوتكنولوجي عندنا معتمد علي 3 حاجات غير باقي المحتوى الأساسي وهي:
1-بايوتكنولوجي الأغذية : والغرض منة إنتاج أغذية معدلة وراثيا
احنا طبعا ف عصر التكنولوجيا دخلت فية ف كل حاجة حتى ف الغذاء ومع تقدم السنوات بتلاقي الغذاء كمان اتغير ف احنا بقى هنتستخدم البايو ف تطوير وتحسين الغذاء عشان تلائم احتياجاتنا..
ممكن نستخدم صفات موجودة ف غذاء ف تحويلة لغذاء تاني يعني برتقال ل يوسفي ذرة لنوع ذرة تاني وهكذا..
وبتتضمن كمان تعديل "الأحياء الدقيقة" اللي بيتم إستخدامها في الإغذية المُنتجة في المصانع عشان تدينا صفات احسن نقدر نطور بيها غذانئا المصنع لو حد راح اتدرب ف مصنع هيفهم معنى كلامي داا..
2-بيوتكنولوجيا_زراعية:
ودا أهم تخصص هتهتم بية لأنة دا صلب زراعة 😀
وهوا انك هتحسن المحاصيل اللي موجودة عندك وتضيف ليها صفات زي مقاومة الحشرات والجفاف والبرودة وغيره
فية حاجه كدا اسمها "الأسمدة الحيوية" بنضيفها للنبات عشان يكتسب صفة المقاومة وتحمل الأمراض دا كله عن طريق البايو 😀
ويتضمن أيضا تعديل النباتات الطبية والعطرية لزيادة المادة الفعالة مثلاً في الأدوية أو تحسين الإنتاج بتاعها، نفرض مثلاً إن نبات مُستخدم لصناعة دواء فيه 20% مادة فعالة، ممكن نخليه 50% .
3- بيوتكنولوجيا_البيئة :
عبارة عن تطبيقات من خلالها تحافظ ع البيئة وتحميها م التلوث طب ازاي 😀
بص يا هندسة البيئة عبارة عن هواء ومياة صح كدا احنا هنستخدم البايو في معالجة المياه الملوثة وتنقية الهواء والتربة عشان نقلل أفعال التلوث دي سواء كانت حيوية أو صناعية زي التلوث بالبترول مثلا.
بالإضافة أن البيوتكنولوجيا هنا ليها دور في إنتاج الوقود الحيوي النظيف 100% وغير مُلوث للبيئة نهائيا..
عن طريق إستخدام الطحالب و الزيوت النباتية بدل ما تصنع زيوت صناعية وتلوث البيئة وترجع للصفر تاني 😀
انت كمان بتدرس تطبيقات تانيه زي علوم بس دول اللي احنا هنركز عليهم لان دا مجالنا وعيب لما نبقى مش عارفين فية حاجة ولا ايه ☺️
========================================
•الدراسه : -
زى ما وضحتلك ال Biotech يتكون من ميكرو وكيمياء ووراثه وفية حاجه Bioinformatics؟
والمجال ده يجمع بين علوم الحاسب وعلوم الجينوم والأحياء
هو تطبيق على تكنولوجيا الحاسبات عشان يتم من خلاله تنظيم المعلومات البيولوجية فى الكائنات الحية يعني بنستخدم الحاسوب لتجميع وتخزين وتحليل وتكامل المعلومات البيولوجية والجينية اللي نقدر بعد كدة نستخدمها فى اكتشاف وتطوير العلاج المبنى على الجينات.
المجال دا مهم جدا ع فكرة وناس كتير مش مدركة أهميتة
بيتم تدريسه لطلاب كليات علوم الحاسب وحاسبات ومعلومات وممكن تاخد كورسات فية كزراعة أو علوم وتجمع بين البايو والبايوفورمتكس😉
يعني هتفضل تدرس اي حاجة لها علاقة بالبايو لحد ما تزهق
• كيمياء بانواعها ( حيوى - تحليلى - عضوى )
• ميكرو ... هتدرس فيه علم البكتريا وعلم الفيروسات وقسم الميكروبيولوجي موجود كتخصص متفرد كمان ف زراعة اسكندرية 💁♂️
وطبعا هتدرس كل انواع الوراثه لأنها تخصص اساسي عشان تتعرف على الكائنات الحية وصفاتها الوراثية 😀
المجال دا مهم جدا لدرجة اني فية جامعات عملتة كليات زي MSA و MTI وجامعة مصر للعلوم والتكنولوجيا🖤
ومفيش فرق خالص بين دا ودا بالعكس نفس المحتوى والدكاترة بييجوا من كليات مصر الحكومية يدرسوا للطلبة هناك بس الفرق الجوهري انك هتلاحظ الإمكانيات هناك عشان الفلوس الفلووووس😂
========================================
_ نتكلم شوية عن المسمى الوظيفي :
بصوا هو المسمى الوظيفى بيختلف على حسب المجال اللى انت هتكمل فيه
يعني لو هنشتغل ف مجال الأسمدة الحيوية واي مجال تطبيقي ذكرناه هتبقى مهندس ف المجال التطبيقي اللي شغال فية ولأنك خريج زراعة.
بالنسبة لموضوع التحاليل اللي الناس قرفتنا بية اه ينفع والله ينفع تفتح معمل بس تاخد الدبلومة وتعمل الترخيص واسمك طبيب كيميائي.
=======================================
مجالات_العمل :
هتلاقي شغل ف مصر ولا لاء؟
طب لازم اخد دراسات عليا عشان اشتغل برا وبلا بلا بلا 😀
فى 3 مجالات تقدر انك تشتغل فيهم بسهوله وبدون تعب وهم :
1- Medical rip
كتير مننا بيسمع عن حاجه اسمها ميديكال ريب .. ودى عباره عن دعايا للادويه انت بتعملها للصيدليات وشغلها متوفر اللى حد ما وبرضو بيشغلوا فيهم صيدله وعلوم
2- Quality Control
فى مصانع وشركات الاغذيه وطبعا دى مفيش اكتر منها فى مصر وشغلها متوفر جدا وتقدر تشتغل كمان ف الإنتاج
3- Medical Analysis
ودى طبعا اكتر حاجه بنسمع عنها وهى " التحاليل الطبيه " وربط التحاليل الطبيه بعلم البيوتكنولوجى انت مؤهل لكدا عشان انت دارس بما يكفي ف القسم لكن نصيحة ركز ف مجالك وسيبك من اعتبرها مش موجودة وانت من حقك تشتغل فيها بس متحطهاش هدف مجال الزراعة كويس جدا والله.
ممكن كمان لو انت مهتم بالبحث العلمي تشتغل ف مركز البحوث أو تتعين معيد بس شد حيلك و تجيب تقدير كويس
ممكن كمان تشتغل ف مصانع الأسمدة والمبيدات والبذور وغيرهم.
========================================
آخر حاجة عايز اقولك عليها اوعي تسمع لحد يقولك القسم ملهوش شغل فمصر علفكرة القسم وكل حاجة بس انت وشطارتك زي اي مجال خد كورسات وورش عمل ونزل أتدرب مصانع لو انت حابب المجال نصيحه ادخلوا ولو ع شغل ف انت حتي لو ملقتش شغل تبع قسمك ف انت عادي مسموح لك تشتغل شغل باقي الاقسام كخريج زراعة
و نصيحه اخيره... لو مش حابب المجال ده متدخلهوش لانك هتتعب فيه جدا
لأن أى مجال علمى مش بيكون سهل بس لو أنت حابه صدقنى هتبدع فيه وهتبقى مجنون بالعلوم وبالبيوتكنولوجى ❤❤
ممكن تقول لنا عن الكورسات آل المفروض اخدها عشان تنمينى فى المجال ده ؟
ردحذفوكمان هل ممكن ابقا خريج زراعة بيوتكنولوجى واشتغل فى البايوتكنولوجيا الحمراء ؟؟
إرسال تعليق